Fai un ano contabámosvos un evento que a ALA, Asociación de Bibliotecas Norteamericanas, celebra na última semana de setembro, a Banned Books Week, para concienciar sobre o dano que fai a censura e consagrar a liberdade de ler. Esta Semana dos Libros Prohibidos intenta irmandar a toda a comunidade do libro, é dicir, bibliotecari@s, libreir@s, editor@s, xornalistas, profesor@s e lector@s, “para compartir a defensa da liberdade para consultar, expresar e manter ideas, incluso aquelas que consideremos non ortodoxas ou impopulares”.
A OIF, Office for Intellectual Freedom, pertencente a ALA, publica o Top Ten dos libros prohibidos nos Estados Unidos, o ano anterior. A lista do 2016 vese reflectida neste vídeo:
Na sala infantil da Biblioteca Ánxel Casal podedes atopar o número 4 que é Soy Jazz, un libro escrito por Jessica Herthel coa axuda de Jazz Jennings, a protagonista desta historia, que foi vetado por retratar a vida dunha nena transxénero, e tamén pola linguaxe utilizada, tratar o tema da educación sexual e ter puntos de vista ofensivos (???)
O acoso da censura aínda neste século XXI cremos que demostra o importante que é a literatura nas nosas vidas. Os prexuízos políticos, relixiosos ou ideolóxicos continúan sendo unha rémora para a liberdade de ler, e por tanto de pensar.Quizá os vetos máis sorprendentes nestas listas do horror son os adicados á literatura infantil e xuvenil, como é o caso da obra de Lewis Carroll, Alicia no país das marabillas, ou a saga de Harry Potter. Neste último, a prohibición dos libros de J.K. Rowling nalgúns estados dos Estados Unidos, estendeuse á Canadá onde unha escola chegou a solicitar autorización materna/paterna para que os nenos e nenas accederan á súa lectura.
Prohibir libros é o mesmo que queimalos, e como dixo o poeta alemán Heinrich Heine, empézase queimando libros e remátase queimando persoas.
Outros libros que foron prohibidos nalgún momento foron os de Wally (onde está…?) de Martin Handford, algúns de Roald Dahl (As bruxas, Charlie e a fábrica de chocolate ou James e o melocotón xigante),o Huckleberry Finn de Mark Twain, ou O principiño de Saint-Exupéry.
Estes vetos son sempre feitos por distintos poderes na procura de xustificacións para impoñerse. Só desde esta perspectiva entendemos a postura de quen pon obxeccións a certas lecturas sen entender ademais que prohibir un texto é a mellor forma de facerlle publicidade.
Se queredes celebrar esta semana dos libros prohibidos o mellor é ler un deles. Como calquera destes: